Moin pèrsonèl, moin lé pa tro pou bann médaye-dékorasyon. La prèv, moin la poin inntyork bann z’afèr-la. Mi pé mèm dir, si in zour bann krokmor i souplègn, akoz mon sèrkèy lé lour pou porté, la pa lo poi médaye la lourdi ali. Akoz sa ? Moin la poin in vré rézon pou vréman, mé déssèrtènn foi, na demoun la gingn sa té i vo pa lo pti morso la kode noré di mète dann zot kolé. Si tèlman zot té malfézan pou la sosyété. Dékor azot, sé donn la konfitir koshon. Solman, moin lé pour bann médaye k’i rékonpans lo moun la fé in n’afèr byin… sirtou kan la pran la défans bann pli fèb, bann san défans, bann zésploité ziska lo trognon pou grossi lo pla bann kolonyalist épi bann kapitalis. Lé vré, konm di lo patoi, moin nana in dan konte sak la fé lo komèrs zésklav, sak la rabèss nout bann zansète avèk zote maléré Kode noir... sak té i tyé kou d’fizy bann zésklav kan té i sava maron. Donk moin na tandans bate la min pou sak i défann la mémoir nout bann zansète zésklav, nout bann zansète imilyé, kolonyalizé. Mi pans zot i mérite byin in dékorasyon. Alors, kan moin la antann Fransoiz Vergès la gingn la Lézyon d’onèr pou sak èl la fine fé pou pran la défans la mémoir nout zansète zésklav, moin té kontan pou vréman. Konm di lo kont, ala in dékorasyon byin mérité.

 Justin