Bann rényoné lé pou le tram-trin, la rout tamarin, lotonomi dann lénèrji, lo solèr pou shof delo, pou rafréshi la kaz kan i fé tro sho. Zot lé par avans pou la modèrnité i réspèk la natir. Zot lé pou dévlopman dirab. Zot i koné sa i tourn otour bann prozé la rézion épi son prézidan. Zot i koné sé la-ba l’apré fé lavnir La rénion.

Solman, zot i konpran bien zot la bézoin le sosial : tout bann moun nana CMU, RMI, l’ASSEDIC, sak nana l’API, larzan salarié... Zot lé fatigé atann in boulo, in kaz pou arès dédan. Zot i anpé pi avèk la sérté d’la vi, la délinkans é tou le rès. Zot i san le sosyal lé an danzé é zot i koné sé la droit l’otèr.

Kan zot i gard dann télé, pou zot sé Ségolène va défann azot kont la droit, va sov le sosyal akoz kan ou l’apré noiyé wi trap in bransh ninportékèl mèm si lé riskab ral aou dann malizé.
Nana in platform lalians : i parl la modèrnité épi i parl le sosyal. Méyèr lidé lé la, méyèr lavoka lé la, solman sa i ariv pa ziska zot zié, ziska zot zorèy. In zour ou l’ot va fini par arivé.

Justin