Dann tan lontan, na pli lontan k’lontan, pou alé la Frans bonpé demoun téi pran bato. Lavion té rar konm korn lapin. Bato-la téi arèt dann in tralé lo por, téi pas ossi dann kanal de Suez dann l’Egypte. Kan téi ariv la-ba, in boug téi mont sï bato pou fé tour d’mazi. Li téi kri : "Gali-gali-gala-gala". Aprésa li té i sar trap son bann pizon, ou koné mèm pa ousa i sort, dann linz demoun. La-ba téi vann la mont, Baya ! Si ou ashté sa, kan bato la fine ariv in pé loin, la mont i marsh pi. Lavé ariyink kartron anndan.

Sa i ramèn amoin sï la politik : sa manyèr diriz in pé, in rézion, in vil. Promèt pa sak i gingn pa doné. Di pa wa fé si na poin moiyin pou fé. Konfonn pa la politik avèk la mazi ! Lé dé zafèr i marsh pa parèy. Si ou vé fé marsh ali parèy, boush lo zyé d’moun, ou pë fé. Solman in pé d’tan apré kan demoun i an apèrsoi, zot gaz i mont, zot lé an kolèr. Ala zot i komans tsann dann shémin.
Gouvèrnaz i marsh pa konm gali-gali-gala-gala. Tansion bann mont i marsh in zourné solman ! Sansa, rod in bon soulyé pou manifèsté !

Justin