Na d’foi, dann z’aktualité, nana nouvèl i kontant aou : ou rossoi sa konm in bon zafèr pou ou pèrsonèl. Na d’foi, nana nouvèl i kontant pa ou : ou rossoi sa konm in mové nouvèl pou ou mèm. Na ankor d’ot foi, ou la pou demandé si sé in bon nouvèl, in mové nouvèl.

Agard problèm bann z’infirmièz bulgare :
Bon nouvèl pou bann z’ot, pou l’médsin, pou z’ot famy, pou z’ot z’ami. Oui, mé mové novèl akoz si ou kalkil bien : in bann marmay i tonm malad, sinkant i mor akoz lavé poin la propté dann lopital. Pou kossa ? Pars l’opital lavé poin larzan k’i falé, médikaman konm k’i falé. Bann péï rish té i boykote La Libye, mèm pou sak lé lo pli néséssèr pou lo pèp. Alor, in katastrof konmsa té près inpossib pou évité.

Mé alor, akoz mète l’otèr dsi bann z’infirmièz épi in médsin, pou kossa tortir azot, kondane azot a mor par dë foi. Tousala, konmsa tout bann vré koupab i ansort prop.
Kalkil ankor la rançon bann péï l’Europ va péyé pou ashté la libérassion bann moun-la : kat san million dolar, in lopital pou rofé, in gran rout, plis ankor “la technologie nucléaire”.

Alor, lé ga ! Ala pou kossa mi di : moin lé kontan konm pa ! Plis an kolèr kan mèm.

Justin