Nicolas Sarkozy la parti fé son tourné-viré dann l’Afrik pou ésplik son politik afrikène. Sa la done ali l’okazion parl déssi « la repentance ». Li la fine di, li lé kont sa !
Li rokoné par li-mèm, pandan la kolonizassion, la fé krime. Li di mèm, déssertin lété krime kont l’« humanité ». Solman, d’apré sak li di, pou li, lo passé, sé lo passé, pars na poin moiyin pou artourn déyèr, épi la pa riyink l’otèr la kolonializasion si l’Afrik nana tousa problèm koméla.

Sa l’assé, solon li, pou évite ali konm Prézidan la Frans domann pardon bann viktime la kolonizasion... Lé ga ! Lo boug lé for ! Li vien di bann z’afrikin, shé zot, li la poin pou demann éskiz ? Li désid par li mèm sak i fo fé ? Konm in vré kolonialist : sé li ki désid ; bann viktime na ka fèrm z’ot také.

Bin non ! Sak i pé koz pou bann koupab, akoz li lé Prézidan in péï avèk tout son listoir, sak lé bien mé galman sak lé mové, sé li. Sé li ki doi dir li rogrète pou vréman, épi avèk li, La Frans i rogrète ossi. Sa mèm i apèl la repentance : si li fé pa sa, lo rèst sé kozman initil !

Justin