Dann tan lontan, dann roiyome la Frans, toute bann jènn té i sava pa fé larmé an mèm tan : té i fé in sort tiraz o sor. Si ou la tir in mové niméro, fouti pou ou, i fo ou sava fé la guèr. Ou larg an plan oute famy, oute kiltir : adié Pièr, la pa sir ou rovien. Sa té lo règleman ! Sof ke, sak la famy té rish té i pèye in moun o flan pou alé son plas. Sa té dann règleman galman !

Sa i fé pans amoin lo kota pou polué la tèr : sak i dépass son kota, li na lo droi ashté in “droi polué” avèk in péï ansèrv pa tout son droi. Na poin lontan, EDF la ashté in droi dann la Chine. Lé ga ! Mon pti pé d’san i bouy ! Kossa i lé so droi fé d’tor la natir, fé d’tor l’imanité ? Oussa i lé la moralité la dan ?
Pou déssèrtin, la moralité, sa in vié film ! Sé larzan ki diriz lo mond ! Épi, sa i marsh ! Lé bien vré, sof ke lané 2012*, na poin in sèl péï nora réspèk lo règloman Kyoto pou konbat la polussion. Alor, sa i apèl i marsh sa ? I marsh sinon i boite ? I marsh sansa kass-in-ki ? Alé dormi don !

* Dominique Bourg de l’Université de Lausanne (Suisse).

Justin