Martin Hirsh i sort bate in pti karé La Rénion pou li diskit avèk bann moun issi déssi l“insertion”. Diskité lé bon, trouv bon zidé, sé in n’ot afèr, trouv bann z’idé i shanj la sitiasion in majorité dmoun, sa lé pli difisil ankor. Sirtou kan bann gran shèf blan i kroi zot tousèl nana bon zidé, épi bann z’indizène, léspri lé sou-dévlopé : i di pa konm sa, mé dann fon, lé konm sa.

Mi pass déssi sa pou zordi, mé m’a arvnir... Akoz, zordi, mi mazine bann prékèr lédikasion nasional : i fé 1200 pèr konm mèr d’famiy. Zot i fé in boulo bien nésséssèr, zot i fé sa bien, dépi in bon koup de tan. Épi, zordi, i di azot : « Donn de l’èr ! Alé azot ! ». Alor, bann moun-la i kriy, i manifèst, dann dézèr (?) : sak i pé désid, sa lé tro rish pou antann azot.

Mi ansouvien bann z’“anploi jène” lavé di, i rètar pa pèrsonn déssi bor shomin ! In bon kozman, mé in kozman mantèr. Zordi, i di bann prékèr lédikasion nasional va mète azot en contrat unique d’insertion : konbien ? 200 solman, mé banna lé pli d’mil ! Alor lé z’ot ? Arien pou zot ! Assé anbète domoun don ! Assé kass lé CUI.

Justin