Matante Zélida la ékrir Justin :

 Mon shèr nové, mon spès salté, té i falé moin té i ékri aou in kou, pars moin lé an kolèr oir dann péi Gwadloup nana bann rouj de fon konm isi : la tèlman anraj amoin, moin lavé anvi lans in kou d’pyé dann télé.
Dézyinm zafèr moin té i vé dir aou, pars moin lé sir sa i doi fatig out tété sa ! Ou la vi lo pti t’onm lé prézidan la Frans-la ? Ou la vi konm sa lé an kapasité — dé tan, troi mouvman — trouv lo solisyon k’i fo ?
A ! fransh vérité, plito k’batay, té i falé solman adrès azot ali ! Té i sifi pou aranz lé shoz...
La droit sé la droit pou vréman, la droit la pli intélizans di mond !

Justin la fé aèl pou répons :

 Mon vyé matant, na in sèl moun déssi la tèr i pans la fine règ lo problèm an Gwadloup. Pars la pankor réglé ditou !
Lo pti shèf i fé toultan konmsa : li koz byin, ou na linprèsyon li la fé konm mazigator, li la tir in solisyon dann son shapo é, aprésa, ou i an apèrsoi la késtyon lé la-mèm é lo bann promès lé la osi !
Lé vré : in promès i vo aryink pou sak i kroi, pa pou sak i fé !
Moin pèrsonèl, mi antan dir : i diskit, i diskit, mé i trouv pa lo bout.
Mi souète i trouv. Mé kan ? Sa sé in gran késtyon ! In solisyon pou konbyin n’tan ? Sa sé in n’ot késtyon.
Rozman, sak ou i apèl "bann rouj de fon" an Gwadloup i vèy sa konm lé dsi l’fé !

Justin