A oui ! Sak la koup filé lo roi martin Sintandré, la byin koupé ! A, fransh vérité ! Li trouv touzour in n’afèr pou dir... rarman vré, la plipar d’tan mantèr, mé li trouv in n’afèr. Lindi soir li la grinp déssi la lanp bann résponsab lo tourism, pou li dir, la pa fé aryinn byin, la gaspiy larzan pou la po patate. D’ayèr, li la di, si la list la droite i gingn zéléksyon li anvoy l’IRT valdingué… pars sa i ansèrv de riyin, pars sé larzan zété, étsétéra-étsétéra, la ké lo ra. Pars lo Virapoullé i koné dé koué li koz vi k’li sé in vré lékspèr dann tourism. La pa li la loué son kaz, dann tan l’apartheid, konsila l’afrik di sid ? Sa lété vanté sa, vi k’kan kréol té i ariv la-ba, kisoi noir, kisoi vèr, kisoi zone, kisoi mélanzé, li lété in blan, mèm si son bann frèr, pou z’ot par, té i manz la mizèr, avèk l’ésploitasyon. Astèr, li èm pi tro l’afrik-di-sid, pars na pi d’gou dépi l’apartheid la fini La pa li, galman, l’avé promète in gran lotèl sink zétoil la-ba gran l’étan,dépi l’ané 1971. Okilé le lotèl ? La poin… zéro l’otèl... zéro kalbass. Zis in park la réjyon la fé la-ba... la pa li, la fé, la rofé, é la rofé fé la mézon Valliamé, dann shomin Lagourgue ? Sa la pa koute aryin k’in katsou, byinsir... mé sa la pa aport anou granshoz déssi la késtyonn tourism. Par l’fète, mèrkrédi l’IRT la fé in konférans dé prèss, pou anparl son bilan épi son bann projé. La pa ditou sak lo roi martin la di, mèm la fé in boulo byin konsékan, byin prométèr pou l’avnir. Tanka lo roi martin, lo roi mantèr, i vo myé lèss ali kozé. Oplis li va kozé, oplis va konprann li l’apré manti. Bèf i trap èk la korde, déssèrtin i trap èk la lang.

 Justin