Premyé Janvyé, Brésil la shanj prézidan : Dilma Roussef la ranplas prézidan Lula, lété fine fé son dé manda. Pou inn foi, i mète in madam konm prézidan dann in péi jéan. Par-la disète foi pli gran k’la France, avèk près dé san milyonn moun. In gran péi pou vréman… mé pandan lontan, sa té i kont pou la po patate. Pèrsone té i sava pa pran l’èr avèk li.
Touzis si tazantan la CIA té i roganiz pa inn-dé kou-d’Éta, pou mète o pouvoir in bann konplis. Touzis si té i parl ali dann foutbal, in foi tou lé kat z’ané. Sansa, la plaz, bann fiy siper-kaloumar, èk zot mayo d’bin fil dantèr, paradi pou touris, kosté ansanm bann favéla la vil Rio, épi la kriminalité…
Zordi lé shoz la shanjé. Koméla, i apèl ali in péi émèrjan, donk i sort dan la nuit pou alé dan la limyèr. Bann gran vaza i gouvèrn lo mond i sava la-ba pou fé lo zoli é pou tash moiyin profite in pé la rishès lo péi. Dé foi mèm li oz anvoy in pé dingué. In péi a suiv, sa lé sir !

Justin