Di sak na pou di

Moin la fé in rèv

Témoignages.re / 6 mai 2013

Lot soir, moin la fé in rèv, an plin someil minui,

Sé Misié mon mèr i Pèrd L’èR, li na in shié sousi,

Son kont zéléksion navé kom in lodèr po zangui,

Gran mazistra déor, lé pa bann zèf la souk a li.

I fo domin li ran la klé la méri, lo bébèt loto osi,

Biyé lavion li nora pi, gran zotel pei sinoi nonpli.

Afors fé lo vèr, é vouloir èt an lèr, é tout pou li,

Ronié son Parti. Gran Barbu la o la pétèt réazi.

Mé gabié kosto i mank pa pou lo foteil la méri.

Na sak i di dann la télé, zot mèm i pass pli zoli,

Na inn dann fénoir i réplik, an kravat li lé bo osi,

Na lot kon i fé sign in pétision, pou fé aprouv a li,

E li avans, li mèm mèm vice-présidan zinsandi !

Personn i koné pa koman batay kok la i sar fini.

Antouka, bann lo mèr la trahi, i sar pa plèr pou li !

Dayèr, bonpé i di a li : sap a ou ! E zamé arviyn pi !

An parmi, inn i cri : dann mon kèr kominis bandé,

Nana kèk zané moin la gravé, an gro rouz fonsé,

Lo proverb kréol sak i di : Bondié i puni pa galé !

Dann mon rèv, lo sène i éspas par koté Sin-André.

Pol


Kanalreunion.com