Oté

2010 apré JC ou 1 apré DR ?

Justin / 21 mé 2011

Na poin lontan d’sa, moin la parti la Pyramid pou voir projé nouvèl rout litoral. Kèl surpriz pou moin : tout i komans an 2010. Poitan, moin la vu dan’d télévizèr in Promyé minis signe in lakor ansamb in prézidan réjiyon an 2007. Dodan lakor lavé nouvél rout litoral é an plis tram-trin.

Oté, ou trouv pa sa bizar ? I vé fé kroi a nou, ke tout la komansé an 2010 ? Dayèr in kamarad la di a moin, si lo sit intèrnèt la Réjyon, tou sa i konsèrn avan 2010, tout la dispari din kou bagèt majik. Otroman di, zarboutan la été antéré dé foi.

Si mi kompran biyin, i fo chanj kalandriyé La Réniyon. Arèt kont dopi Jésus Christ, mé kont dopi Didier Robert la ariv la Piramid. Orézman, kalandriyé la, i tard pa i sa arété.

Justin


Kanalreunion.com