Oté

2012 konm 2002, mé la plas lo mor lé riskab shanjé !

Justin / 7 avril 2011

Matant Zélida la ékrir Justin :
Mon shèr nové, mon spès salté,
Zot i kroi nout ti prézidan lé mor, alé oir li bouz ankor. Son l’armé modèrn i done le grin la-ba dann la Kot-d’Ivoire, dann péi Libye, sansa ankor dann péi l’Afghanistan. Prézidan li mèm i réinir lo G-20, lo G-8, lé dé ansanm kékfoi pou diskite déssi bann gran problèm nana déssi la tèr, pou trouv in bon solisyon.
Zordi, in pé bann sondèr i di konmsa Sarkozy la pa in bon kandida pou zéléksyon l’ané poshène, mé tansyon ! Yèr la pa zordi, zordi pa demin ! Sak ou i pans lé vré zordi lé riskab ète fo demin. Touléka, moin pèrsonèl, moin na konfyans dan li ; Moin lé sir li sé lo méyèr kandida la droite é sé li-mèm lé riskab gingn lo zéléksyon demin. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr,
Mi trouv drol manyèr ou i parl Sarkozy. Kan lo boug l’apré pran lo fon, sé l’èr ou i oi ali dsi la otèr. Kan lo boug l’apré fouy son trou, sé lèr ou oi ali an lèr. Ou i konpran ali bien kant mèm ? Ou i oi bien, li l’apré rode élimine la gosh promyé tour, pou ar fé lo mèm tak-tik ké Chirac, kan Lionèl Jospin la pran la plas lo mor. Mé, pétète, pars son shoviy la gonflé, li rann pa li kont sé li k’lé riskab ète viré promyé tour, é dézyèm tour, sé la gosh lé riskab gagné.
Konm in pé i di : 2012 lé riskab ète konm 2002, mé so foi issi, sé Sarko li-mèm lé riskab pran la plas lo mor.

Justin


Kanalreunion.com