Oté

4 moi, 20 zour, alon arkomans konté !

Justin / 3 mé 2014

5 désanm 2013 ; mon gro bouk fine ariv gran-pèr ; mi asèt in sèv po mèt ék li : si mi mèt a li ék son fi, i fé linsèst ; la rolizion, la koutime, la sians, lérédité tout i rofiz mariaz dan la fami.
Mon zanfan i komans done in non tout bann kabri la.

Mon papa lavé in bèf koupé té tèlman gro, i ral in sarèt ti zouk, tou sèl, ziska tabisman, èk in tone 500 kann, konm rien ! Nou lavé apèl a li Berlié, konm in mark bann gro kamion lontan !
Nou sé done lo pli vié bouk lo non Mérsédès ; son fi Demoizèl ; konm son fanm zordi lé maron nou la apèl a èl Marone.
Donk Mérsédès la mont si Marone lo 5 désanm : zot i koné bann kabri po giny ti i fo atann 4 moi 20 zour ; 25 avril, Marone la giny in sèl ti sèv, lé maron konm èl ! Nou la apèl a él Maronèt.

Oté moin la poin la sa ns !
So matin mi ariv dan mon karo zakasi ; mi aport lo grin dan in marmit po mon bann zanimo ! Oui di pa Maronèt na in sominn, i dor si lo koté a tèr ! I lèv pi ! Marone i kri ; la, lo tti i respir ankor, lo kèr i bat doung doung !
Koué la rivé ?

Dapré moin, lo monmon la dor si sonn ti ; in monmon i kraz son zanfan an dorman ? El i san pa son gro poi si son ti marmay ?!
Esay mèt lo tti si tété lo monmon ; li tèt pi ; donn in ti pé d lo ; li aval !
Bayoun, si li tien pi dobout ? Son kolone vèrtébral fini kasé, li lé invalid po la vi !
Dépi kèl èr li lé san manzé ? Mi done in ti pé d sél konm domoun ; a si moin lété vétérinèr ? Si moin lavé in stok lé artifisièl, bibron, tétine, pétèt moin noré ginye sové ? La lé mor.
Alon arkomans konté kat moi vin zour ! Koué va fé ?

 Justin 


Kanalreunion.com