Oté

A ! Kapitalis, kapitalis, ou i koné fé d’zafèr !

Justin / 19 février 2013

Dann sistèm kapitalis, nana zafèr bandé : inn, son bondyé sé larzan... lo profi si zot i vé, dé, tout sak lé bon pou fé larzan lé bon pou li. Moin lé sir, inn-dé kamarad va di amoin sa in vérité Lapalisse. Dakor ! Mé dé foi, lé bon rapèl in vérité, mèm si la pa in dékouvèrt éstraordinèr. Pou kosa mi di sa ? Zot i ansouvien lo lépizod la vash fol ? Zot i rapèl té i bril karkas mouton, an parmi sak té malad, épi té i mélanj sa avèk rasyon manzé pou bèf. Rézilta : bèf la gingn lo maladi, aprésa sé bann moun la gagné. Bann gouvèrnman la komans afolé, la aplik lo prinsip prékosyon é la anpèsh manz la moèl, lo bann zintèstin, lo foi, lo kèr épi tout lo tranbleman... An plis ké sa, la défann done la farine la vyann bann poison sak i élèv pou manzé. La défann galman mète la farine la vyann dann manzé zanimo.

Sa la dir in bon koup de tan, mé firamézir, la mafya la vyann la mète a dir, sa sé in n’afèr i fé pèrd azot larzan, kansa i interdi lo linterdiksyon. Konm la mafya, d’apré sak i di, nana son bann dalon in pé dan tout péi, in pé dan tout parlman, épi osi dan l’Erop, firamézir zot la nyabou shanj l’opinyon bann zélu, bann gouvèrnman é koatéra. La komisyon éropéène i sort désid kosa d’apré zot ? I sort désid, l’ané 2013 nora la pèrmisyon mélanz la farine la vyann avèk manzé pou poison. Arzout èk sa, pou l’ané 2014, va pèrmète mélanz la farine poison dann manjé zanimo. Pars bann zélvèr i pèrd tro larzan ??? Kisa i sousyé bann zélvèr ? Mi pans pa na in bonpé gro kolon lé trakasé pou sa. Mé bann kapitalis lélvaz, zot, zot na zot moiyin pou fé présyon. Donk, si moin lé sir bann zélvèr i gingn ar pa in moné an plis, sak mi pans, sé ké bann kapitalis la vyann, zot va fé zot bèr la-dsi.

In konparézon : bann zélvèr shoval, zot la vann zot vyann bon marshé (dé éro a s’ki paré), mé dan la suit dan la shène, nana in pé la fé dé mil é dé san. Donk sa v’ariv ankor pou la vyann poison épi la vyann tou kour. A moins ké demoun i désid diminyé la vyann dan zot manjé. L’èr-la, bann zélvèr va gingn lo kou, é bann kapitalis va vann la vyann pli shèr. Ziskatan v’ariv in nouvo maladi, in nouvo kontraryété... A ! Kapitalis, kapitalis, ou i koné fé d’zafèr.

NB : Tout fason, zidé i mank pa : dopi mélanz la taye volay èk bon manzé, ziska pik koshon avèk la pénisiline, ziska ankor tout kalité tripotaz mi sa pa ékri isi. Mé, si mi di, moin lé sir in pé i mèt azot karèm la vyann pou la vi.

Justin


Kanalreunion.com