Oté

A kisa i lé lo zanfan ?

Justin / 20 févrié 2016

Konm mwin zot i wa, zot i antan lo débat d’si lo kod di travay laba déor, i prétan gouvérnman la désid détrikot tout lo kod, donkalor talèr va prézant lo prozé d’lwa si la réform di kod di travay. Lo tèks lé paré é la miniss di travay, sad zordi la, la miniss hollande i prétan di “A mwin lo momon lo tèks aktièl“. Mi sort antann in ot miniss, sad la, in lansyin miniss sad sarkozy, li osi li prétan dir “Lo tèks konm i lé i konvyin a li é boudikont li pouré èt lo papa“.

Mi akout lo prézidan di médèf, li osi li di “konm i lé lo tèks, konm i lé li vot zyé férmé, a li parin“. Ziss pou konprann po kosa inn a lot i pé rovandik lo tèks. Anndan lo nouvo kod i di, i rèy in tré si lo 35 èr, in moun i pé travay ziska 60 èr par sominm san angardé si travay lé pénib ousinon. Bann marmay na pwin ankor 18 an va travay ziska 10 èr par zour, konm sa i pé désot 40 èr par sominn. Ni pé konprann poukoué la drwat èk lo médèf i fé lo kok, i di ta nou.

Lasé pou désertin di “Hollande lé pi la èk nou, boudikont li la finn désid roul a drwat tout“. Inn la di minm “La politik hollande i aminn, pou travayèr zordi lé pli pir sak Sarkozy té i aminn yèr“. Pétèt lé égzazéré di sa konm sa, mé si pou lo nouvo kod, sindika la lèv an guèp konm sa, bann moun la gosh, lo gosh pou vréman, banna i vé pa an nantann parlé, minm moun son kan, moun pou li, son parti néna a rodir. Nou minm, ni pé poz a nou késtyon “A kisa i lé lo zanfan“.


Kanalreunion.com