Oté

« A koté fimyé, brède i boush pa son trou d’né ! »

In kozman pou la rout

Justin / 29 out 2016

Sa sé in drol z’afèr pou vréman ! Majine in pé in pyé brède apré boush son né ! Romark si sé pou fé in désin komik ébin sé in n’afèr lé posib maziné. Mé kosa sa i vé dir pou vréman ? Zot i koné fimyé, sa i fé pous brèd, i fé grandi ali, i fé grosi ali donk lé bon pou li, sirtou pou nou, kan ni fé nout bouyon, sansa nout frékasé, nout sop-sui. Lé vré li san pa la roz édouar mé kosa sa i fé ? Nana osi médikaman na mové gou, mèm mové l’odèr, mé sa i fé anou d’bien... Astèr zot i koné bonpé d’moun i rod l’arzan poitan sa la pa in modèl la proprété é ni krash pa dsi, malorèzman ! L’anprèr Vespasien la invant toilèt piblik péyant é kan son garson la fé romark ali lé kant mèm pa rokomandé fé l’arzan dsi in kékshoz konmsa, li la réponn : « Mon garson l’arzan la poin l’odèr ! ». Alé ! Ni artrouv pli d’van é mi lès azot kass z’ot koko d’tète la dsi !


Kanalreunion.com