Oté

A… ! la kiltir, na osi la kiltir siantifik, bizar, bizar !

Justin / 31 octobre 2013

Zot i koné, an so moman, la séshrès i mèt dir, dépi dé troi moi, pokor vu in gout la pli. Touzour si lo térin mi okip, yèr moin lavé 3 grin poi po mèt dan la tèr, mé baya, la tèr lé sèk, sèk, sèk. Zistoman, na in boutèy lo i trèn la dépi moi dout dan mon tant kanping, la moisi vèr la fine rant dann lo, anfin sé d’zalg, konm sak na dan la mèr, mikroskopik, mèm lo boutèy plastik na in koulèr vèr.

Si mi vèrs tout lo boutèy din kou, lo va débordé, va koulé, va d’sann dan la pant, nora poin lo tan mouy mon grin d’poi, apré gro solèy, konm i sof, va évapor lo pti pé d’lo vitman !

Din kou, mi trouv, si mi ranvèrs lo boutèy lo débousé, mi anfons lo goulo dan la tèr. Ou kroi lo i d’sann ar pa, pars lo grin la tèr kab arbous lo boutèy ?

Ou i tronp, a koz ?

Mon ti fiy la giny konprann sa so matin, moin la fé la mèm soz èk dé-troi baton manyok piké an ron, èl i di a moin : « lèr lé dan la tèr, i armont, i rant dan la boutèy lo » , lèr i pran la plas lo et lo i d’sann dan la tèr dousman, lèr i mont bul par bul, lo i sar mouy lo baton manyok dousman dousman, la tèr i pran tout lo, i pèrd pa aryin.

An réalité, kan lèr i mont dan la boutèy, sé la présyon atmosférik i “pèz” si lo po fé d’sann a li ! Mé Archimède avan Zézi-kri, in Grèk, té i éksplik dézà sa, nou la apri sa lékol… mé zot lé dakor, la kiltir, mi vé parl la kiltir siantifik, zot i trouv pa sa bizar, pourtan li mèn lo mond. Si ni koné pa, i anpès pa nou viv ! Mé si ni koné, lé kan mèm méyèr, moin la invant in sistèm gout a gout !

Justin


Kanalreunion.com