Oté

A linsi de zot plin gré !

Justin / 21 mé 2015

Néna moun lé gran, gran minm parské zot i wa lwin, lwin. Néna konm sa, i di in nafèr zordi, lo nafèr i réaliz pouvréman domin ousinonsa apré domin, i provwa in nafèr i sar tourn konm sa, i tourn pa otroman. Koman ni apèl sa ? Ni apèl sa bann visionèr. Ni pé an koz dé sa vik néna dan nout Parti. Mé la zordi mi vé an koz in nafèr i fé di a mwin lo boug té i wa lwin. 1977, si tout radio, dann tout télé ni antann in shanson Pièr Péré, mwin lé sir zot i koné. Lili. Dann son shanson li rakont listwar inn ti mamzèl i sort an somali pou v’ni travay Pari.

Li rakont koman dann in bato plinn zémigré (sa i rapèl pa zot kekshoz zot la vi dann télé ?) zot i véné de zot plin gré pou vid bann poubèl a Pari. Li rakont osi koman Lili té akèyi, li di osi poukoué Lili la kit la Somali, pou fui la gèr, pou alé rod son soso. Li di konmsa lili lé v’ni dé son plin gré, dann tan la navé travay déor, pou rokonstri la frans, zis apré la gèr, lavé bozwin bann zémigré. Ek Lili, li la poz lo problinm lintégrasyion bann zémigré an frans. Poukoué mi parl dé Lili zordi ?

Sé dérnié tan, Kan mi rogard télé mi wa ryink bato rampli d’moun i sort in pé partou, an dériv. Andan la néna gramoun, néna madam, néna zanfan. Konbyin Lili néna ? Kisa lo kèr i singn pa kan i wa sa ? Néna i di pou rézon lé konsa vik néna la gèr la ba, néna la faminn osi é bann vizionèr zistoman i di la pa zordi la vèy pou éstopé. Bann zanimo lé konm sa, i mèt a li in landrwa lé sèk, na pwin ryin é bin li sava touzour rod in landra néna dolo é néna pou manzé. Konm zanimo, bana i vyin « A linsi dé zot plin gré » !


Kanalreunion.com