Oté

A moins dé zoué san pour san lo zé dé po noir épi mask blan

Justin / 2 désanm 2016

Mi sort ékout dési l’internet, in kozman mésyé Mélanchon apré ké bann z’éléktèr la droite la désid sé mésyé Fillon zot va prézant konm kandida pou proshin zéléksyon prézidansyèl é moin la antann ali dir : biensir ké nana dann La frans in l’éléktora réaksyonèr é biensir ké banna lé nonbré. Sa lé pa in rézon pou dékouv banna zordi solman pars sa i fé in bout tan ké lo mouvman réaksyonèr i égzis dann La Frans.

Lindi pasé, moin la antann Françoise Vergès apré parl dsi la kultur. Momandoné na in moun, an parmi lo bann pèrsone té dan la sal la poz aèl in késtyon dsi la MCUR è dann sa répons, èl osi la anparl lo mouvman réaksyonèr isi osi La Rényon pou rokonète ké nana osi bann réaksyonèr isi osi shé nou. El la di simploman ké isi lo mouvman na pétète pa égzakteman lo mèm baz ké dann La Frans. i fo dir dé l’istoir diféran i donn pa lo mèm mouvman dann l’opinyon.

Mi pans noré pi dir lo mèm z’afèr dsi lo mouvman progrésis isi La Rényon é la-ba dan La Frans. Noré pi dir galman d’in koté konm de l’ot na poin forséman lo mèm kontour lo mèm baz. Ala pou kosa désèrtin progrésis La Frans, mèm bann l’iltra-gosh i sort an frans rouz pou vnir blé isi La Rényon osinonsa zot i intérès pa zot sak i éspas dann la politik La Rényon.

I di, souvan dé foi ké z’éléksyon dan La frans épi z’éléksyon La rényon i donn pa lo mèm rézilta. In pé savan politolog i di, dann télé, pou sak i vé bien akout azot ké lo rézilta isi lé souvan lo kontrèr sak la ba. I fo vérifyé pars la pa in vérité absoli, mé sak lé sir sé ké la politik isi épi la politik la-ba i vé pa dir la mèm shoz ditou. A moins ké ni ariv a zoué san pour lo zé dé po noir é mask blan.


Kanalreunion.com