Oté

A par k’sa la invite azot pou fé parade !

Justin / 15 zwiyé 2010

Yèr, l’avé in défilé la-ba Paris. Toulézan nana sa dépi plis san tan. Bon pou sa mèm ! Shak ané, i rode in manyèr orizinal pou so fète nasyonal-la. So foi issi, la siprime in garden-party pars i fo fé zékonomi. Donk la konomiz sète san mil éro... mi pans noré té pli valab pa ashté in nouvo l’aviyon pou lo prézidan, vi ké sète-la i koute san katrovin milyon l’éro. Sa noré té in vré lékonomi.
So foi issi ankor, la invite l’armé bann péi l’Afrik, pou défilé… pars bann péi-la la vni donn in kou d’min la France kan l’avé la guèr. Mèm in milyonn solda la fé so jèss-la é plis san mil la gingn la mor. Donk, sa sé in bon jèss, konmsa bann Fransé va armète dann zot tète, l’Outre-mèr té la shak foi la France té dann danzé.
Solman, ou i pé domandé si banna té byin rékonpansé. Par égzanp, si zot la gingn in rotrète konm bann z’ansyin konbatan la métropol. É bin non ! Pars zot ti moné la rèss parèy pandan karann-sète an. L’ané 2006, la rovi in pé la késtyon, mé domi-domi san donn bann z’ansyin konbatan afrikin épi malgash lo mèm droi.
San parl mové politik la France l’amène dann son bann z’ansyin koloni. A par sa, i invite azot pou fé parade.

NB : Byinsir, lo prézidan lé pa pirate avèk bann promèss. Li la di bann shèf l’État, li sava rogoumante larzan bann rotrété militèr l’Afrik. Gran prométèr… pti donèr !

Justin


Kanalreunion.com