Oté

A par sa, koi d’nèf Doktèr Ramgoolam ?

Témoignages.re / 11 avril 2011

Sanmdi soir, moin la antann dann télé, Doktèr Ramgoolam, promyé minis l’il Moris la konm di bann rényoné in pèp l’asisté. Li la pa di sa dirèktoman konmsa, mé prèské. Sak moin la antann ali dir té a popré kékshoz konm sa : « Sarkozy la di akoz bann rényoné lé pa kapab fèr sak Moris la nyabou fèr ? ». Épi, li l’arjoute li aksèp pa l’idé k’in pèp i pé ète asisté. Sanm pou moin la la di sa dann in rényon piblik, mé sa i shanj pa lé shoz : an piblik, sansa dann in éstidyo télé, sansa ankor otour in dal puri lé parèy. Sak la di, lé di !

Solman, mi fé la romark la pa Ramgoolam la drèss anou in kostime asisté konm sa. Mi romark bann rényoné ossi, in pé an touléka, i ézite pa trète zot konpatriyot asisté. Solman dan zot boush na arienk bann moun pov i pé ète asisté, pars lo boug son pla lé bien gonflé, li gingn in bon moné issi, li trouv pa li lé asisté li ! I anpèsh pa li di bann ti-kolon lé asisté é li lé pa. Pou Sarkozy, sak i énèrv sé ké li lé dann la vi piblik dépi in bon koup de tan, é mi pans pa la késtyonn dévlopman l’outre-mèr, la anpèsh ali dormi. Pars li la fine gingn l’okazion, é pa arienk in foi, fé son possib pou ède anou rant dann shomin dévlopman mé li la pa fé. Sa lé énèrvan ! Pli pir, sa la pa anpèsh ali donn la min bann fossoiyèr pou kass nout bon komansmann dévlopman.

L’èr ni oi koman Air Austral l’apré dévlopé, l’èr nout soidizan izolman i pèrmète nout konpagni réjyonal réyone dann l’oséan indien pou komansé, épi pou alé pli loin ankor, ni pé di nou ossi, nou lé kapab. L’èr ni oi koman nou lété apré marsh dann shomin l’otonomi énèrjétik. L’èr ni oi kossa nou la fé dann in pti koup de tan, ni pé di, nou ossi, nou lé kapab. L’èr La Rényon i propoz pou dévlop bann tic, pou roganiz lo ko-dévlopman dann nout réjyon pou règ ansanm la késtyonn nout gingn-manjé, pou protèz nout natir, ni pé dir nou ossi lé kapab. Nou la pa in pèp asisté, nou la solman pankor gingn fé nout révolisyon antikolonyal. Ou i konpran sa ?

A par k’sa, konm Bugs Bunny noré di : « Koi d’nèf Doktèr Ramgoolam ? ». Kansa ni komans pou vréman travay séryèzman ansanm... é san fyoné !

Justin


Kanalreunion.com