Oté

A ! Si moin té kapab ! kèl zoli liv l’istoir moin n’ora fé !

Justin / 2 out 2016

Mi pans si zot la lir lo tit mon modékri, zot i doi domandé, dann z’ot kèr in liv l’istoir dsi kisa ou sinonsa kosa mi port mon rèv, mon délir. Poitan lé pa konpliké ! Lé pa difisil pou savoir ! Si mi rèv ékri in zoli liv l’istoir sé dsi lé dé shoz lé bien klasé, an promyé, dann fon mon kèr : l’istoir mon péi épi l’istoir mon parti.

Astèr pou kosa mi ékri : « si mi gingn » ? Nana in pé n’oré di « si moin l’avé lo tan »mél o tan sé sak toulmoun nana an kantité, alé oir sé la kapasité ké toulmoun na poin... Pars ékri in gran liv l’istoir dsi in péi épi son parti dopi près soisant z’ané talè la pa si fasil ké sa : mèm si lo péi lé pti, mèm si lo tan la pa tro long, mèm si sé in parti an parmi lé z’ot parti.

Dann mon tèt, mi antrovoi kosa mi èmré trouv dann so liv-la : dabor mon nasyon kréol dann la manyèr li la évolyé, dopi la guèr trant-nèf karant sink, ziska zordi avèk son l’ékonomi, son l’anvironeman épi son kiltir épi san obliyé son l’amour-détèstasyon pou lo péi kolonizatèr... épizapré mon parti koman li lé éné, koman li la grandi é koman li la konète dé-o é dé-ba ziska la kriz li konète dopi 2010. In kriz k’i pé pétète fé disparète ali, konm pa…

A travèr kèl griyaz l’analiz mi véré sa ? Mi pans si mi di azot, zot lé riskab dir mi pans konm in moun dépasé bin m’a dir azot kant mèm-si moin té kapab - moin n’oré fé in l’analiz marksis tout sak moin la di an-o la san mète dé koté lo matéryalism, pars sé la-dan mi rotrouv amoin bien konm k’i fo.

Lé difisil ? A oui da ! Lé konpliké ? A oui da ! Sé pou sa mi di pa zot si moin l’avé lo tan, mé mi di azot si moin lété kapab. Kèl zoli liv, moin n’ora ékri pou éklèr l’éspri mon bann konpatriyot avan alé l’ot koté épi kan moin n’arté fine alé !


Kanalreunion.com