Oté

« Afèr trakasé kan la mèr lé bèl ? »

In kozman pou la rout

Justin / 14 avril 2016

Kozman-la i fé pans amoin lo tan moin téi sava Sin-lé in pé souvan. L’èr-la, moin téi koné in bonpé péshèr kanot é dé-foi moin téi romark zot i avèy la mèr mé zot i sort pa. L’èr-la mi domann pou kosa kanot i sort pa é banna té i di : rogard la point shato, rogard la point-o-sèl, kan ni oi nana l’ékime i bouyone dsi kap, ni sort pa pars tangaj la pa loin. Donk la mèr i pé z’ète bèl mé pa pou lontan. Bin nout kozman alor ? Nout kozman sé pou dir la pa bézoin trakasé kan l’èr d’traka la pankor arivé. Kan i fo i fo, mé ka kontrèr non. Trakas pa pou sak i pé ariv domin, sansa apré-domin, sansa k’i ariv ar pa zamé. In bon filozofi pou moin, dan la vi.


Kanalreunion.com