Oté

Afors alé a lo, kalbas i pèt !

Justin / 1er février 2013

Mi sort lir dann in zournal, soisann-troi pou san bann Fransé i pans l’Éta lé an fayit. Moin la lir dann nout zournal in modékri Wilfrid Bertile i amontr lo kontrèr, é moin pèrsonèl, moin lé dakor avèk li. Pou kosa ? Pars pou èt an fayit, i fo ou i gingn pi pèy out krédi, é i fo, konm in pé i di, ou na poin moiyin pou ardrès out l’antropriz si ou na in l’antropriz, arzout èk sa, out aktif lé fay mèm par rapor out pasif. La Frans lé pa dann in ka konm sa.

Alor, pou kosa la majorité d’moun i pans konm sa alor ? Pars, moin lé sir, d’moun i mèt in pé sak zot i vé dan lo mo “fayit”, sansa dan lo mo “Éta”. Pars mi oi osi bann z’ékspèr apré fé prann anou zour apré zour po d’shanm pou pla kouvèr. Pars zot propagand lé si tèlman matraké dan l’opinion ké d’moun i fini par kroir dé shoz la pa vré. Pli pir, kan la majorité d’moun viktime in politik i fini par kroir sé lo politik i fo pou lo péi, l’èr-la bann viktime lé kui, bann bouro lé gagnan. In l’égzanp ? Na in moun la di amoin, gouvèrnman i pé pa done in moné bann jèn lé dann gran difikilté, san soutien é san sokour. Mi koné pa si lé vré, mé mi koné, la trouv par santèn miliar pou bann bank, épi la soulaz lo poi z’inpo dsi bann moun friké.

Na in n’afèr moin l’apré maziné : kan Fillon la parti dan la Corse, na in bon koup de tan, li la di, san rir, li lé Promié minis in l’Éta an fayit. Dan l’ané mèm, gouvèrnman la komans raz nout pint, é fé pas anou firamézir dan l’ostérité, an misoukant. Zordi, in ga i apèl Sapin i arkomans di lo péi lé an fayit. L’èr-la, mi domann amoin si na poin konm in prozé pou pèrs anou konm in bigarad, raz nout pint, mèt anou dann in tablatir mi rakont pa zot, ziska tan sé nout posh k’i san sapin.

Avan fé sa, lé mié zot i réflèshi lo ka la Grès. Mi sort antann dir, dopi la obliz péi-la fé in politik l’ostérité, é bin, lo défisit la doublé. Antansion ! Si i fé in n’afèr konm sa, lé riskab so kou isi mèt pou vréman la Frans dan la fayit. Afors alé a lo, kalbas i pèt.

 Justin 


Kanalreunion.com