Oté

Afors alé a-lo, kalbas i pète !

Justin / 16 novanm 2011

Isi La Rényon, pou in oui, pou in non, mé zamé san rézon, demoun i manifès, i anbar shomin. Isi, i apèl sa grévé. Mèm demoun i travay pa i pé grèvé, mèm marmay i grèv, mèm gramoun i grèv, pou mark zot lé pa kontan. Pars sizé mékontantman i anmank pa dan nout péi. Pars lé shoz i roul pa ron, i marsh pa konm k’i dovré. In zour bann paran i grèv pars lo mètr l’ékol la pa la. In zour bann z’élèv i grèv pars i fé tro sho, sansa pars la bouf lé pa korèk. I grèv ankor pars na poin térin pou fé lo zimnastik, pars la poin lojman an konsékans, pars travay lé mal péyé, sansa pars la poin travay ditou pou sak i vé bouloté.
Avan yèr, bann moun Sin-Bénoi, sité Labourdonnais, si mi tronp pa, la grévé pars na poin travay. In madam i asplik, èl la vi inn-dé jenn marmay apré komans grévé ; l’èr-la, èl la parti rode son bann kopine épi èl la fé lo ta avèk banna. Madam-la i ésplik, èl la bézoin in travay, mé èl na poin ; èl i vé pa asiz san fé arien, mé gingn son vi par son travay. Moin lé sir, na in pé i konpran pa sa ; zot i doi di, ou i gingn l’arzan zanfan, ou i gingn RSA, akoz ou i kontant pa ou sak ou nana, olèrk fé la révolisyon dann shomin, pou an-nuir l’moun. Moin lé sir, na kèk pèrsone i konpran pa sa... i konpran pa pou kosa bann mèr d’famiy i sava mélanj zot kolèr avèk sak bann jenn, alé oir la pa ditou lo mèm z’afèr, la pa lo mèm ka !
La pa lo mèm ka ? Sa i rès a oir, pars in moun la poin boulo i arsanm bien in moun na poin boulo. In loiyé, kan li lé pa péyé, sé in loiyé kan li lé pa péyé. Manzé san gou, ni santiman, sé manzé san gou, ni santiman ; Savat lo doi sé savat lo doi, é kan li fonn dsi goudron, li fonnn dsi goudron. Arzout èk sa in travay an sold, san itilité, san valèr par raport ou mèm, kèl valèr an plis i done in moun san boulo, sansa avèk in boulo san près l’itilité.
Nana o-moins san sinkant mil pèrsone lé konmsa isi La Rényon, bann domandèr l’anploi, promyé avèk dézyèm katégori ; san-sinkant mil pèrsone an az, an fors, an kapasité pou travay dan lo péi, mé lé konmsa, la pa bézoin azot. Mé na in zour i apèl domin ! Afors alé a lo, kalbas i pète !

 Justin 


Kanalreunion.com