Oté

Afors alé a lo, kalbass i pète !

Justin / 11 out 2011

Matante Zélida la ékrir Justin :
Mon shèr nové, mon spès salté,
Mi an apèrsoi, in pé lé an révolisyon, pars pou l’EDF fé lo santral tèrmik, banna la fé vni sète san travayèr l’Erop. Bin kosa i mète azot an shalèr konmsa ? Banna na poin lo droi vni travay isi, dann in réjyon l’Erop ? Mi oi pa par kèl règloman zot i prétan, bann rouj-de-fon an tète, anpèsh banna travay isi. Mi an apèrsoi ankor, in pé i ronf konm moush sharbon dann boi pouri pars, konm tou lé zan, in kantité l’amontrèr i vien travay dann lisé, kolèj, pti lékol, gran lékol. La lé for la ! Par kèl kalité règloman in Fransé i pé pa vni travay dann in réjyon la Frans ! Moin lé a dmandé si i mank pa in pyès désou zot kapo... Pars sansa zot nora trouv normal bann Fransé d’Frans i vien travay isi é bann Fransé d’La Rényon i gingn lo droi alé travay la-ba. Moin pèrsonèl, na poin arien k’i shok amoin la-dan. Tok ! Pran sa pou toi !

Justin la fé pou répons :
Mon vyé matante k’i koz touzour la boush rouvèr,
In kozman konm ou la di la i va bien avèk ou ! Pars si ou la oubliyé, m’a rapèl aou nana 147.000 pèrsone na laz pou travay, i mark zot nom Pol anploi é sa i avans azot de riyin. Nana plis in jenn dési dé, donk plis sinkant pour san nout jénès lé dann shomaj. Dann toute famiy nana shomèr, nana pov, nana san lojman an poundyak. Di pa moin, sa la pa in sityasion éksépsyonèl, é si lé vré, i fo bann mézir éksépsyonèl. Otroman, lé shoz va kontinyé konmsa, é plizanplis Rényoné va rèss dann bordaj shomin.
Koman sak la gingn fèr pou la rout Tamarin i gingn pa fèr pou l’izine tèrmik Lo Por ? Akoz, an parmi lo sète san travayèr, i anbosh pa o moins sink-si san travayèr rényoné ? Nou lé pa kapab ? Alor toute nout diplome sé fo-papyé, tout nout savoir-fèr i égzis pa... Ou sinonsa, na pi pèrsone lé kapab koz pou nou konm kan Paul Vergès té prézidan la Réjyon. Sé plito sa, vi kroi pa ? Koman sak la gingn fèr apré la guèr, kan la anbosh in kantité Rényoné konm amontrèr lékol, i pé pa fèr zordi... alé oir nana diplomé an kantité dan nout zénès. Akoz i fé pa ? Pars sé bann kominis k’i domann ? Pars sé bann sindika k’i réklam ? Zot i oi pa nout zénès konman èl lé gaspiyé ! Konman èl lé dépité ! Mé konm di lo kont : afors alé a lo, kalbass i pète !

Justin


Kanalreunion.com