Oté

« Afors fé lo z’anfan out z’anfan, ou va fini konm z’anfan out ti z’anfan ! »

In kozman pou la rout

Justin / 23 zwiyé 2016

Mi koné pa si zot la romarké, mé oplis i sava, oplis désèrtin paran i mète z’ot z’anfan dsi la otèr épi, sanm pou moin, zot i rabès azot in pé : z’ot z’anfan nana tout kalité, tout kapasité é zot, lé konmsi z’ot tète lé lavé par l’intéryèr, zot i fé konmsi zot na pi okin kapasié, okin talan. Zot i kroi k’an rotour zot i gingn l’admirasyon z’ot zanfan ? O ki d’babouk, aoir Pyèr, tak baro ! Momandoné zot i shas pi avèk z’ot z’anfan, i bril la paye inn avèk l’ot. So kou isi zot i arport z’ot l’admirasyon pou z’ot ti-z’anfan . Pli pti z’afèr l’ot i fé lé konm in manifèstasyon lo jéni lo marmaye. Pou gingn koué, an rotour, in zour ? Parèy k’an o la. Pou mon par, mi pans shakinn kisoi z’anfan, kisoi papi, kisoi mami, li na son prop talan é avèk lo tan, plito ké lès sa tonbé, i fo li ranfors sa, i fo son pyé d’boi la konésans i donn pli-z’an plis lo frui, pli-z’an plis zoli frui. Alé ! ni artrouv pli d’van !


Kanalreunion.com