Oté

Air Austral dann danjé : Pou sif la fin lo z’Éta zénéro l’Outre-mèr !

Justin / 14 zanvié 2012

Kosa in bon pé rant nou té i fé lo sis novanm dé mil-nèf ? Mi sipoz nou la ékout Sarkozy parl dann télé. Pars zour-la, le ga té i sava tir son konklizyon dsi z’Éta zénéro l’Outre-mèr. Moin lé sir, in pé bann gran klèrk té i dévé mazine sa in pèrt de tan, pars zot i pans zot i koné tout é la poin arien pèrsone lé kapab amontr azot. Poitan, si zot i rapèl bien, nout parti la partisip so z’Éta zénéro-la, pars sé konm in dévoir pou li èt prézan partou ousa i diskit l’avnir Rényoné.

Zot i souvien, kan Paul Vergès la sort dann rényon-la, li la di li lé kontan kan i di sak nout parti i répèt dépi lontan. Zot i koné kosa l’arivé apré ? La donn bann moun té pa dakor èk sa pou aplik sak i dévé èt in bann désizyon pou l’Outre-mèr. Lo Promyé minis la pa fé arien, pars sanm pou moin, li sé in portré é pa plis ké sa. La ministrèz l’Outre-mèr té pa la èk sa, plito li la dévir ki-dsi tèt sak prézidan la di. Bann konplotèr la tourn sa konm i tourn in boné zourit, pars sak té i fo fèr, sé désann Paul Vergès, pars lété lo pli gran danzé pou bann kapitalis konprador, é lo pli gran l’éspoir pou tout sak i vé lo dévlopman La Rényon.

Konbienn pa nou la fé an aryèr ? Konbien la shans nou la lèss filé sou nout né ? Zordi, lo diskour lo sis novanm 2009 lé mor é antéré. La tyé lo tram-trin, la tyé la MCUR, la fout atèr l’otonomi énèrzétik. Pou lo promès 2000 bis, ni koné kosa l’arivé : nana zéro kalbas la fimé Gran-boi ! Pou la rout litoral sis voi, nou va konèt biento. Lo droi travay pou bann kad rényoné sir plas, i anparl mèm pi. Pou lo dévlopman andojènn, i anparl pi... sof k’in mayon for, Air Austral, lé dann in séryé danzé. Pou kosa ? Pou élimine Paul Vergès, ou sinonsa pou tyé nout l’éspoir in vré dévlopman dan l’oséan Indien é, boudikont, pou sif la fin lo z’Éta zénéro l’Outre-mèr.

 Justin


Kanalreunion.com