Oté

Akoz domin, i randré pa Bertile résponsab léshèk prévi d’madam Ledoux ?

Justin / 18 octob 2013

Moin la lir dann "Témoignages", na poin lontan dann zournal léksprès l’avé in modékri pou dir pou rod demoun konpétan, pou travay La Rényon i fo fé vnir azot dopi La Frans égzagonal. Gouvèrnman sosyalis i sort amontr anou, pou li galman sé konm sa... La pa bézoin alé rod loin, la pa bézoin fé lo tour tout bann gran sèrvis pou romark in n’afèr konmsa. Pou rod in résponsab la kopérasyon dann loséan Indien la parti shèrch in moun i sort dann nor-es la Frans, épi la donn ali lo tit anbasadèr.

Mi domann amoin si bann Rényoné i san azot imilyé par in désizyon konmsa. Poitan zot i dovré ! Pou kosa ? Pars isi nana demoun konpétan, nana demoun nana in bon konésans loséan Indien : i koné bien Maurice, Madagaskar, Komor, Sésèl épi La Rényon san konté bann péi kontinan konm l’Inn, épi d’ot ankor. Armète èk sa l’Afrik di sid épi l’Afrik dé l’és. Moin pèrsonèl, mi koné in bon kantité d’moun lé konm sa. Olèrk shoizi inn an parmi, la parti shèrch in moun l’Ardenn.

Sinploman pou bien amontr bann Rényoné, gouvèrnman na poin konfyans dann zot kapasasité. La pa promyé foi gouvèrnman i fé sa ! I fo dir osi kan i donn in moun in misyon kom la donn mésyé Lebreton i pé pa di li la fé avans la solisyon lo problèm pozé. Mi pans mèm, li la fé arkil la késtyonn la rényonizasion l’anploi. Moin pèrsonèl, mi pans l’alyénasion kolonyal lé bien for isi shé nou é sak i rod kass la kord l’aliénasion, bann zasisté d’luks i pran ali pou in défalké. Mi di pa ki, mé na kan mèm kék moun konmsa !

Sak ni oi, séké nou na poin lokazion travay pou nout péi, é domin va di, sé nou l’otèr, si lé shoz i marsh pa bien. Domin va rann anou résponsab la kriz, léshèk é konpagni… Akoz pa domin, rann Bertile résponsab léshèk anonsé d’madam Ledoux ?

 Justin 


Kanalreunion.com