Oté

Akoz pa konm l’ané 1946, in vote a l’inanimité ?

Justin / 16 févrié 2010

L’ané 1946, ni koné, Raymond Vergès, Léon Lépervanche épi d’ot ankor la propoz in loi pou transform an départman La Guyane, La Guadeloupe, La Martinique épi La Rényon. Bann député la vote loi-la konm k’i diré a l’inanimité. Té mérité, pars loi-la la déside fini avèk la ras la dominasyon kolonyalis.
Zordi, sé lo problèm nout dévlopman k’i mérite trouv in solisyon valab, é pou komansé, i fo fé lo tram-train... Nou na in problèm pou sa : gouvèrnman i ézite vèrs anou in l’ède katrovinsink milyon, konm li fé pou bann Réjyon la Frans. Sé pa ké li vé pa, sé ké li di, i fo in modifikasyonn loi pou sa. Bon ! Donk i fo in modifikasyonn loi pou nou an avoir in mèm trètman ké d’ot Réjyon... in modifikasyonn loi pou nout l’égalité avèk lé z’ot. Sé in késtyon k’i dépass lo l’ède ni domann. Sé in prinsip la Répiblik k’i ral déyèr pou apliké.
Mi pans pa si an parmi bann dépité épi bann sénatèr, nana ankor lé kont l’égalité. Si lé konmsa, fé lo loi, épi mi éspèr nora in bon majorité pou loi-la... solman, si shak foi k’i fo aplik in bon mézir pou nou, i fo fé in vote déssi l’égalité, mi oi pa ousa nou v’alé, vi k’i vir lo do avèk nout prinsip l’égalité. I modifyé in loi par in loi... d’akor ! Mé la, sé pa in gran modifikasyonn loi... zis pou azoute anou dodan, konm la fé avèk kréol La Rényon pou bann lang réjyonal. Akoz dé poi-dé mézir ? Akoz sak lé vré dann in ka i pé pa ète vré dan l’ote ? Pars in koté nana l’arzan, l’ot koté la poin ?
Bon, alon fé pass in loi, san tardé, pou fini avèk so ral-kont la... é mi éspèr bann dépité, konm bann sénatèr, toute va vote loi-la. Akoz pa konm l’ané 1946, in vote a l’inanimité ? Sré valab in n’afèr konmsa.

 Justin 


Kanalreunion.com