Oté

Akoz pa lité é mèt panyé Lurel dan la poubèl ?

Justin / 1 zwin 2013

Lo gouvèrnman la déside mèt in poin final avèk lo RSTA a konté 31 mé 2013. Aprésa, sar fini, mé gouvèrnman i pans, sansa li fé sanblan pansé, bann lantropriz va prann lo rolé. Donk si mi konpran bien, bann lantropriz va kontinyé pèy lo sinkant éro la prime COSPAR épi pétèt li va pèy lo san éro dé RSTA. Sa i fé 150 éro.

Kont dési, mé fyé pa tro, pars mi oi partou ousa bann travayèr la vanjé, té konm in rash-kèr pou lantropriz donn azot in pti moné. Carrefour la préfèr lès son bann travayèr batay plizyèr somèn, épi pèrd kèk milyon, avann aksèp donn azot in logmantasyon 46 éro solman. Donk, soi lo gouvèrnman li sé in inbésil, soi li pran anou pou in bann kouyon. Mésyé Lurel, mi pans, i konpran bien sak li l’apré di, bann travayèr i pé pa kroir in n’afèr konm sa. Li mèm i fo li pins ali si li dor évéyé.

Amoin ké li baz dsi son panyé 108 zartik, mé finalman, bann konsomatèr la fine rann azot kont par zot mèm, avèk in pti pé produi konm sa, i sava pa tro loin, i sifi pa pou in ménaz fé son laprovizyonman konm k’i fo. Si mi tronp pa, la list COSPAR lavé par-la 240 produi dodan. Sac i fé kant mèm plis dé foi plis é bann konsomatèr té i artouv plis zot kont.

Amoin ké ! amoin ké bann Rényoné i révèy in kou... Bann moun néo-kalédoni, pou zot par, zot la révéyé é zot mouvman la dir par-la douz somèn pou in bon rézilta. Alor, akoz pa lité nou osi épi, konm k’i diré, mèt panyé Lurel dan la poubè ?

 Justin 


Kanalreunion.com