Oté

Aksélèr lo mouvman si i fo !

Lotonomi dann l’énèrzi ?

Justin / 8 août 2009

Toute demoun i suiv in pé l’aktyalité, moin lé sir zot i sort aprann dé nouvèl i fé pa plézir. La promyér, lo pri kouran i sava goumanté. I parétré gouvèrnman i sava anons lo nouvo pri kinz out par-la. Dézyèm nouvèl : i paré bann rézèrv pétrol lé pa si mirobolan té i dizé avan, mé in pé i di dépi lontan l’apré ramass mantèr la-dsi. Si zot i azoute èk sa lo rapyangsité bann konpagni pétrolyèr, zot i pé konprann nout porte-moné i sava gingn le shok, nout pouvoir d’asha lé riskab rétrési an po d’shagrin.
Alor tou l’moun i di, moin konm lé z’ote, lénèrzi, sa i mank pa déssi la tèr, nana mèm an kantité. Mé an kantité oussa ? Dan la mèr, sou la tèr dann rin volkan, dan l’èr, dann déssèrtin plantasyon ? Lé vré, lé mèm byin vré ! Mé i fo alé trap ali, é pou trap ali, i fo fé in bann z’instalasyon pou fé kouran, sansa pou ékonomizé. Mé sa i fé pa an in zour, é sa i fé pa avèk la krash, san in bon téknik : i fo le tan, i fo larzan, i fo bann moun kalifyé i kass z’ot tète, i fé travay z’ot koko.
In l’inkonvényan : kan ou nana an sifizans, ou i trakass pa, ou i prépar pa l’avnir. Kan i komans an manké, éstèr-la ou sèy fé lo possib, mé i komans ète tar. Mé konm di lo kont : tardra-vyindra, i anpèsh pa nou aksélèr lo mouvman pou trap nout lotonomi dann lénèrzi.

Justin


Lésplikasyon inn-dé pti mo :

Rapyang : l’anvi ging plis k’i n’an fo. In sorte tonton "grip-sou".

Gingn le shok : gingn lo kou.

Kass le koko : fé travay la tète.

Tardra-vyindra : pti-pti pa v’arivé.


Kanalreunion.com