Oté

Ala in bon règloman, pou la fyèrté bann rényoné !

Justin / 2 octob 2009

Kant i ariv in zéléksyon é kant lé shoz lé riskab pa tourn dann bon sans pou la Droite, ou i an apèrsoi, dann l’informasyon, si lé possib, i donn in pti kou d’pous dann in sèrtin diréksyon. Ou i rann aou konte, pli souvan k’i fo, l’aparèy d’État lé tanté d’pass in kal parti kominis, ou sinonsa sak lé alyansé avèk li... Pli pir, i diré, i fé tou lo néssésèr pou fé mal konsidèr bann Rényoné, z’ot z’éli, so foi issi kisoi Droite, kisoi Gosh, kisoi sinploman rényoné.
Na dé foi, i donn la parol in boug, inn foi, dé foi, troi foi pou li mal-parl in kandida k’i porte kont lo kandida la Droite. Sé zour issi, la donn la parol in sèrtin Éric Raoult épi ni koné kossa li la di, é la poin in zournalist la sèy kal ali in pé, la mèm pa di, kan li lé la-ba dann Paris, li lé pou l’amityé avèk Kiba, ou byin la Koré, mé kan li lé issi, li malparl, li di H. Bello, avèk banna, sé topète morète. Mé pèrsone la pa d’mann ali sa, l’èr i fo sobate pou défann la popilasyon Sin-Pol… épi la popilasyon La Rényon… pou tash moiyin tir anou dan la kriz. Anplis, dir in n’afèr konmsa, sé ète vréman mal-édiké, mal fondé, mal réspéktyé pou nou, bann Rényoné.
Fi t’in tan, Laurent Vèrgès la di dovan bann dépité in fraz i fo pa zamé ni obli, vi k’sé in bon règloman pou toute Rényoné, tout sak lé fyèr èt Rényoné, san an avoir bézoin pran an konte son l’opinion dann la politik, in fraz i fo ni mark an lète d’or dann nout krédo la politik... Li la di : « Nou lé pa pliss, nou lé pa moins, réspèkt anou ! ». Ala vréman in bon règloman pou la fyèrté bann rényoné.

Justin


Kanalreunion.com