Oté

Ala inn-dé nouvèl sak la spasé dann lo mond

Témoignages.re / 18 zwin 2016

La-ba, dann l’Amérik nana in ga la rant dann in boit de nui dann in vil i apèl Orlando épi li la tir dann ta : plis sinkant tyé, plis sinkant blésé. Lo ga la di li la fé sa pars li fé parti bann solda l’EI (état islamik). In pé va di alon plèr avèk lo pèp amérikin ! Lo pèp amérikin dakor, mé pa son bann dirijan pars d’apré sak moin la antann l’éta islamik, sa in kréasyon bann sèrvis sogré amérikin. Si la pa sa, zot i fé pou lo fron Al-nostra arienk pars zot i vé fout atèr lo gouvèrnman La Syrie. La Frans osi la pa otroman, ga, kroiyé-moi.

Nana dé polis osi, lo bononm avèk lo madam, in ga l’asasine azot kou d’kouto la-ba dann Pari. Li osi la di li fé sa pars li lé solda l’éta islamik. Sa sé in n’afèr i fé singn lo kèr pars, arzout èksa, l’avé in pti zanfan troizan avèk zot é li la gingn shapé mé dann kèl éta psikolozik : lé sir li sar tromatizé pou tout son vi. Gouvèrnman la désid mète ali konm pipiye la nasyon, mé sa i rann ar pa li son famiy… In pé i di sa sé la gèr ! Donk i fo amenn ali konm in gèr ! Fasil pou dir mé pli difisil pou fèr. Mi diré la osi, bann fransé l’apré siport tout lo kouyonis z’ot gouvèrnman la fé, mé sa i éskiz pal o bann fanatik.

I paré mé la ni sanz sizé. Donk i paré dann 30 % bann péi dsi la tèr i oi pi la voi lakté, i oi tré pé zétoil par la fote la kantité limyèr i bonbard dann diréksyon lo syèl. Arzouté avèk la polisyon sa i done lo rézilta mi di azot. Zot i koné kan ou na la korn dsi lo zyé-katarak si zot i vé ! kan ou i rogard lo syèl ou i oi pi zétoil. Donk, l’èr k’i lé plizanplis demoun lé konm demoun nana la katarak é i oi pi klèr dann syèl. Demoun sé in n’afèr mé zoizo : lo syèl i sèrv azot pou zot ging l’oryantasyon pou alé dann péi zot i sava an tou tan é ala ké zordi, in bon pé i ariv pi diriz azot. La p’asé ! Mète ankor ! Bann kriminèl l’anvironeman.

Krime kont l’anvironeman : sa i fé pans amoin pou lapromyèr foi dpi dé mil é dé san z’ané, lé posib ké la glas i disparète dsi lo pol nor dann l’été boréal. L’ané pasé la rès ankor in pé d’plak mé sète ané la lé pa bon sak i sar éspasé. Na in pé i trouv sa lé égzazéré é pou zot si la kalote polèr i sava diminyé an larzèr épi an otèr, la pa sète ané ankor la glas va fonn totalman. Dizon sa sé la gèr rant bann savan tanpir, é bann savan, tanmyé mé tout fason la pa in bon n’afèr pou nou ditou.


Kanalreunion.com