Oté

Ala l’afèr ! si ou i vé pa konpran, pran konstan !

Justin / 3 mars 2010

Matante Zélida la ékrir Justin :

Mon shèr nové, mon spès salté,
Si mi konpran byin zot, bann rouj-de-fon, zot la anvi abèss de moun zot-la, zot i vé done demoun travay salissan. Moin la mèm antann de dir ké zot i vé kréol i triy mousoush, épi i gingn zot vi la-dan. Mi voudré byin voir azot propoz inn famiy in travay konmsa pou zot zanfan. Zot lé riskab gingn i valval dann koko d’tète, sansa in mastapin, dann bar d’kou. Boudikont, zot i mérite sa mèm. Tok, pran sa pou toi !

Justin la fé aèl pou répons :

Mon vyé matante k’i koz aryink la boush ouvèr,
Si mi konpran aou byin... sré in dézonèr travay pou gingn son vi si lo travay lé fatigan, lé salissan. Rès san riyin fèr, sé prézèrv son dignité, sé konsèrv son konsidérasyon ? Poitan, vi koné dann déssèrtin péi, i ar-fé viv ziska soisant pour san bann déshé : kisoi papyé, plastik, karoutshou, la féray, bann motèr, fil kuiv, étsétéra. Arzoute èk sa, nana toute kalité métyé la-dan, triyèr, zouvriyé, kontromète, zanploiyé dann biro d’étide, shofèr... é bann métyé i rann aou fyèr kan ou i fé é pa pli salissan ké d’ote vi k’sé in boulo mékanizé, antomatik, sansa somi-antomatik. Kan ou i fé bann métyé konmsa, ou i sava pa domann siouplé, ou i fé réspèk out dignité, oute famiy i réspèkt aou, é ou i rann sèrvis out péi. Mi azoute, ou i marsh an karnèr dann shomin. Ala l’afèr ! si ou i vé pa konpran, pran konstan !

 Justin 


Kanalreunion.com