Oté

Ala pou kosa ni vé ranpli, par nou-mèm, la kok l’artik 29

Justin / 30 zanvié 2012

Somènn dèrnyèr, dann in gran sal la-ba dann in kartyé i apèl Le Bourget, François Hollande la koz dovan in paké d’moun. Sa lété son promyé gran diskour la kanpagn, é d’apré sak moin l’a antandi, d’apré sak bann zournal la di, li la pa mank son rantré. Landomin, li la fé son soisant propozisyon po gouvèrn la France. Elie Hoarau i pans, nana désèrtin propozisyon lé pa mal, touléka, lo zour avèk la nuite par rapor la politik Sarkozy.
Bien sir, bann propozisyon-la, i fo étidyé sa dan lo détay. Nou na l’tan pou fé sa, vi k’zéléksyon prézidan i tonm finn moi d’avril. Sinploman nana in propozisyon niméro 29. Sète-la i konsèrn solman bann péi l’Outre-mèr, donk sa i vo galman pou La Rényon. Dizon, sa in kozman, in kokiy i arès pou ranpli. Pars, kosa ni vé nou o-zis ? Ni vé sak Paul Vergès épi Elie Hoarau épi d’ot résponsab nout parti la fine di. Kosa zot la di ? Zot la di, zot i vé négosyé avèk lo fitir gouvèrnman in plan dévlopman pou La Rényon. Pou kosa ? Pars nout sityasion lé si tèlman grav par rapor sèt bann Fransé k’i pé pa aplik anou lo mèm désizyon va pran pou la-ba. Nou la poin lo mèm nivo dévlopman, nou lé dan l’oséan Indien, nou la pankor fé nout révolisyon pou in l’ékonomi é in sosyété modèrn, dévlopé. Plis trann-nèf pour san bann Tényoné la poin boulo. Arzout èk sa, plis la moityé dmoun lé pov. Ala pou kosa i fo sé nou-mèm i ékri nout plan dévlopman.
Arzout èk sa, fransh vérité, sé nou k’i koné myé sak i konvien pou nou épi kont dsi nou, plito k’si baton tonton pou travèrs la rivyèr. Ala pou kosa sé nou k’i doi ranpli la kok l’artik 29, mèm si apré, i fo ni diskite avèk gouvèrnman la France.

NB : La pa nouvo sa pou nou, pars nana lontan ni fé sa, é sa in n’afèr ni koné fé réèlman.

Justin


Kanalreunion.com