Oté

Ala pou kossa i fo lisansyé ali l’ané k’i vien !

Justin / 19 févrié 2011

Dan la komine Sint-Mari, in konpagni d’lo i téroriz la popilasyon avèk in bann bel-bel faktir. Pa pou delo zot la tilizé, mé pou lo la koul in pé partou dossou batiman. In sèl z’afèr la konpagni ignor, lartik 24 son prop konvansyon k’i di konmsa, si lo faktir lé tro lour akoz in fuite, bann konsomatèr na droi in dégrèvman. Solman i di pa zot sa avan, i atann zot i anbar shomin pou lir lo konvansyon dépi promyé lign ziska dèrnyé lign. Lé pa étonan in pé lo kardyak la lévé, la tansyon la monté, la pèrd l’apéti ;
La-ba dann Tampon, zandarm l’arète in dirizan liséin pars, paré-t’il, li la fé roul in rou dann shomin, dann in manifèstasyon. La, la trouv li la dégrade lo bien d’moun. La larg lo marmay plis dé zèr apré, pars son bann dalon la manifésté é la anbar la sirkilasyon dovan la zandarmri ; I fo dir, bann jenn la vanjé pars gouvèrnman l’apré fé n’inport de koué, san sousyé l’avnir la zénèss.
Dé troi lisé épi dé troi kolèj la fèrmé, pars gouvèrnman la fé amontr son plan pou travay myé avèk bann amontrèr an moin. I paré, i pé bien travay dann in klass avèk 35 zélèv ; sak la zamé konète in n’afèr konmsa, la rantré va konète. Gouvèrnman i vé pi mète larzan an kantité dann lansègnman ; pars bann rish lé kapab pèy kour privé pou zot zanfan, épi pars Pol anploi lé pa fé pou bann shien.
Na poin arien a voir rant lo troi z’afèr moin la di, sof ké sa la politik nout gouvèrnman. Ala pou kossa i fo lisansyé ali l’ané k’i vien.

Justin


Kanalreunion.com