Oté

Ala pou kossa moin lé rant dé kèr !

Justin / 25 out 2011

Mi pans, konm moin, in bonpé d’moun konm di kréol lé rant dé kèr : zot lé kontan konm pa, zot lé sirman in pé zéné déssi lé z’antournir. Mi vé anparl in prosé i sort éspas la-ba dann l’Amérik dovan in tribinal la vil Nou-york. Mi vé anparl biensir lo prosé kont méssyé DSK.

Pou kossa mi pé an avoir lo kèr klèr ? Pars, in moun, sanm pou moin lé inossan, la nyabou tir son kolé dann la dann in n’afèr d’loi. Pars la-ba, konm issi lérèr dann tribinal la pa rar konm korn lapin. Moin la pèr si in n’afèr konmsa l’avé ariv La Rényon é si la pèrsone akizé lété in kominis sansa in moun la vré gosh, l’afèr té riskab pa fini konmsa. In pé va di moun-la lé konm tromp la mor, li ropliy son zèl avan k’i toush ali. Myé, ké li fé pa konfyans la zistis son péi... Inkyète pa, mi koné listoir la zistis déssi mon boute doi dépi plis sinkantan. Donk, in rézon anplis pou ète kontan sak bann zij la déside la-ba dann l’Amérik.

Pou kossa moin lé in pé zéné déssi lé z’antournir ? Pars, moun vyolé sansa moun forsé, zonm konm fanm mé plis fanm sa lé sir, nana in bonpé, in pé partou, é souvan défoi i pran pa zot o séryé. Poitan, in viktime la bézoin la zistis i pran son pityé, la sosyété i protèz ali pars li lé pli fèb. I fo pa galman, bann vyolèr sansa bann forsèr i trouv in lankourazman dann zot mové rol. Moin la pèr, lo rézilta lo prosé DSK lé riskab ankouraz déssèrtin moun primèr, sansa k’i pran demoun konm zot propriyété.

Ala pou kossa, konm moin la di, moin lé rant dé kèr.

Justin


Kanalreunion.com