Oté

Alon done kréol travay dan son péi

Justin / 17 octob 2013

{{}}Oté, o pli o somé d’leta i respek pa in prinsip « la priorité lanploi bann moun la rézion dan zot rézion ».
Sa i vé dir, Zalzasiin dan Lalzas, Lorin dan la Lorèn, Breton an Bretagn, Ch’ti dan lo Nor, Provansio dan la Provans, Martiniké an Martinik, Gouadloupéin an Gouadloup, Guyané an Guyane, Réyoné à La Rényon !
Pa difisil po konprann ; dayèr, gouvernman la biin konpri é zot i aplik biin po lé zantiy, mé po nou, riin a fèr ; lo dernié skandal sé la nominasyon in sertin madame Ledoux, i sort in vil an Frans...
Koman ti pé aksepté sa : normalman, lanbasasdris(dèr) locéan Indiin i devré èt kelkin i koné biin la rézion ; nou lavé in boug, agrézé zéografi, ansiin mèr osi, visprézidan la Rézion Rényon ; lu la été sékrétèr zénéral Comisyon loséan Indiin pandan dé zané, Wilfrid Bertile ; a koz la rofiz son kandidatir ? Kréol pa kapab ? Ki i an vé bann Rénioné po pa done a zot responsabilité ? Sé de l’ ostrasisme ; nu pouré presk dir sé du rasism ; kome Emile Zola, nou akiz in Etat laïque pa respèk son prinsip dégalité, liberté é fraternité.
Li done pa Zantiyé é Réyoné minm droi ; li avantaz Martiniké, Guadloupéin, Guyané ; li mèt Zantiyé dovan, loin dovan a nou kréol loséan Indiin, a koz ?
Nout marmay i sar lékol, i aprann lang, lo droi, i ginye bon pé diplom, après i nome pa zot si post responsabilité ; i ar dékouraz bann profésèr ; é koué sa i serv done formasyon si o bou di kont, i tiin pa kont ; minm bann zinn i observ sa, sa lé révoltan ; nou va fini par métt in révolisyon si i kontinié konm sa !
Done kréol travay dan son péi !

 Justin 


Kanalreunion.com