Oté

Alon fèr !
In l’ané de ri,
i pé pa fé d’tor kant mèm !

Justin / 21 zwiyé 2009

Na in patoi i di konmsa : "I vo myé abiy aou, ké d’nouri aou !". Sa in fasson pou kass lé kui in moun i manz an gourman. Pars lé vré na d’moun, ou i diré lo bouzaron la poin l’fon.
Oté ! I manz, i manz, i manz oui, pa pou fé sanblan.
A ! Zistoman, mi sort antann in n’afèr : i prétan dir na in zournal la droite i roganiz in konkour, plito in lotri. Si lotri. Si, ou i gingn.
D’apré zot, kossa ou i gingn ? Akoute amoin byin : ou i gingn do ri pou in n’ané. Oui, konpèr !

Bin akoz, aryink do ri ? Sa i manz pa tèl-ke-sé, sa ? I fo l’akonpagnman ! Kansréti in pé lo grin, in pé brède, dé boute boukané, in pti zïng la mori griyé, épi dé grin piman. Moins ké sa, lé pa valab !
Biensir, mon dalon ! I pouré mèm dir, k’in onm sé pa aryink in tib dizèstif. Lé vré, li manz li boir — san zégzajéré ! — li bingn, li nouri son sèrvo avèk in bon litératir, li fé léspor, étsétéra-étsétéra-la ké lo ra...
Mé sirman, lo zournal la kalkil bann Rényoné, sak zot i èm sirtou, sé manzé, épi lo ri sé la baz. Arzoute ankor, èk sa, in pé i mazine lo tan la guèr, mèm si dann tan-la, z’ot papa té i rèv pa ankor sort dan rin z’ot granpèr.

Éya, bondyé ! Souvan-dé-foi, la pa bézoin gran-gran diskour pou konète kossa i pans de nou, i sifi d’avèy in pé sak lé pa volontèr, konm bann zé, sansa la piblisité. Ankor éré, la pa promète anou in koshon dann zoué-la. Pars noré pi dir, dann shak moun nana in koshon an-somèy !
Alé, marmay, zoué, zoué mèm ! Graté, graté mèm ! In l’ané de ri, i pé pa fé d’tor kant mèm. Alon fèr !

 Justin


Kanalreunion.com