Oté

Alon konsult lis éléktoral… dé foi i pé avoir dé surpriz !

Témoignages.re / 16 janvier 2014

Non, lis la pa ankor pré ; ou na radiasyon ; inskripsyon dofis ; désédé ; sanzman dadrès ; minm sanzman d komine ; plizir ka. Moin la parti war : si défoi konm lontan, nad mor i vot !
Mé nad ka i fé réflési !

Lo vré lis konplé sra pré lo 28 févrié.
Si mi vé in lis konplé zordi , mi pé giny sak 2012 si in klé USB dan mon méri (biro éléktoral). Apré moin na ka lir dan mon lordinatèr !

Kan minm,ou dékouv zafèr bizar ; par egzanp, Ph P : « perte des qualités requises par la loi » ! Koué li la parti fé ? In marmay normal mi kroiz tou lé zour dann somin ! Li la volé ? Li la violé ? Li la tié ? I di a ou, lo tribinal la donn son désizion ; nou rod pa la rézon. Nou la poin lo droi rodé ! I ogard pa nou ! vi privé !?
In not H R-P : « radié pour L.33-1 ». Koué k sé ankor la loi 33-1 ?

Pli bél ;ma voizine 40 an , i inskri promié foi ! Na 22 zan él té i pé voté,el la pa voté !
Vo mié tar ke zamé ! Na in kandida la du partir di a el : « oté, alé inskri a toué, ton voi i kont, vot po moin, mi vé ranport la viktwar, 1 voi plis 1 voi plis 1 voi sa kab fé in bon pé ! »
Sa kalité moun, idi souvan : « la politik i serv ariin… ». Sa i vot pa éléksyon profésyonèl, paran délèv ; zot i partisip pa la vi sosial, syndikal ; zot i lès lé zot désid po zot ; na degré dinkonsians lé asé grav , si ti miltipli par plizir ka dan lo minm ka !!!

Dan mon komine 80 000 abitan, prèsk 60 000 zéléktèr ! Po koué tou sa la ?
Pars in bon pé moun lé inskri, la fini parti dan in not péi, zot lapa fé ray zot non !
Aprè trouv drol na bon pé zabstansyon ! Zinskri fantom !
Konsult lis éléktoral la !

 Justin 


Kanalreunion.com