Oté

Alon koz sériè : la zourné d lafame, a koz in zour ?

Témoignages.re / 8 mars 2014

Dir, dir po in nonm koz ou vant la fame ; telman lonm la été souvan responsab lé mizèr dé fanm ; naka ogard lé violans ; dan lo mo violans nana viol ; non pandan lontan dan bokou d sosiété zén fi i giny pa lo minm zinstriksyon ; i giny pa léritaz, ziska zot non zot i transmé pa, po fini nana minm dé sivilizasyon si té i pé tié lo fétis féminin dan lvant son monmon té i tié.

Na pa lontan ankor (pét-èt minm i kontinié zordi !) an Afrik, dan sertin péi, i anlèv lo klitoris lé fanm ; minm lo plézir lo pli élémantèr i anlèv a zot, i apèl sa koutime barbar ; barbar dakor a koz touzour vizavi dé fanm solman !?
La montré ke lé fanm lé plu zékonom ke lé zonm ; tromandi, donn 100 éro in fanm, él i fé pli d soz ék sa kin nonm.

La fanm sé la pé ; ou la déza vi in gèr provoké par in bann fanm ?
La pandan la gèr dé zonm, fanm dérièr i arlèv la tèt po sov lo zanfan, lo téritoir, lagrikiltir, lindistri, lédikasyon, lo sosial.
Lo zonm la foute an lèr, sé lé fanm ki roprann po armèt dan lord !
Toute fason, konm èl lé pli prè dé zanfan dépi la kréasyon, la nésans, la kroisans, lo tété, lédikasyon familial, él lé kapab sakrifié sé propr bézoin po donn son bann zanfan, po nouri a zot, abi zot, fé grandi…

Lo bononm osi mé moin… zénéralman.
La fame sé lavenir de lonm, sa dawar lé vré.
Justine lavenir Justin, mi sar tonm dan son bra, moin lé dakor avèk sa moin, pa zot ?
Alon koz pli sèrié ; i fo pa in zour solman po la fame, i fo 365 su 365 ; la moin sré pli dakor.

 Justin 


Kanalreunion.com