Oté

Alon parl l’otosifizans alimantèr ! Alon parl de ri !

Justin / 18 novanm 2015

Mi sort arlir lo pti liv nout parti la tiré na poin si tèlman lontan é mi souvien bien nou la anparl de sa kan nou la roganiz in séminèr la-ba dann Sin-Pyèr. Dann ti broshir-la nana vinn-sink mézir minimom si ni vé fé sort nout péi dann malizé. Bien sir mi sava pa anparl tout lo bannt poin mé inn tousèl pou komansé, lo poin 20 k’i port dsi l’oto-sifizans alimantèr. Koman gingn nout manzé par nou-mèm é sète nout famiy dann lo fitir ?

Pou moin, sa in poin kapital, é konm moin lé optimis mi pans sa sé in poin ni pé gingn trapé é sirtou ni pé trap ali vite… Si ni vé bien ! é si ni anbèk dann in éstratézi la riptir, dann nout l’agrikiltir galman. Mi donn arienk in poin : ni manz de ri é ni plant pa in sèl pyé . Poitan la natir rényonèz i di pa nou li lé pa kapab rosovoir bann plantasyon d’riz… dann nout pasé nana dé péryod nou la plant de ri, é de ri bien bon siouplé !

Ni pé pi plant sa koméla, d’apré zot ? Myé k’sa ni pé plant de ri bio avèk in bon rannman, kisoi lo ri SRI k’i plant Madagascar, kisoi lo ri Nérica i plant dann l’Afrik dé l’ouès… Avèk sa pa z’in gram l’angré shimik , pa in myète dézèrban, pa ditou d’zinséktisid modèrn mé avèk in bonpé lo soin, avèk l’uil de koud sansa in sèrtin dégré la mékanizasyon6 La tèr, konm ni koné, lé paré pou rann anou lo bon soin nou nan avèk èl.

La tèr I mank anou ? 7000 éktar an frish i domann arienk pou k’i plant do ri dodan.… Moin na poin la plas pou di pliské sa, mé lo poin 20 nout program I pé amen anou trap nout otosifizans alimantèr é trap ali vite siouplé..

NB Sak i vé ransègnman i pé alé dsi Témoignages é zot i mank ar pa l’informasyon. Solman in vré plan pou nout dévlopman l aprodiksyon manzé lé bien nésésèr ;


Kanalreunion.com