Oté

Alors atann, mé kont pa d’si !

Justin / 29 désanm 2015

Alors atann, mé kont pa d’si !

Lané 2015 i anshèv, lé lèr fé in pé lo bilan si sak la fé, sak la pokor fé é boudikont konm lé éspésyalis la prévi, lané la té ankor pli rèd sat 2014 i di. Solon mwin lo nonm domoun na pwin travay la goumanté ankor ziska an awar plis 170000 i atann. Konm tou lé zan, marmay diplomé i mank pa nou, sèt ané ankor néna plis 10000 la gingn zot bak, pou alé ou ? Ta lèr, tousala i sar rod travay, lané proshinn robolot. Ziskakan ?

Eksa néna bann marmay sad lékol i rofiz aforstan, konm zot na pwin diplom, andan la néna o mwin 80 pour san pou rèt a tèr. Lo bilan 2015 lé konm lo bilan 2014 lé konm lo bilan 2013 sétadir lo bilan lé mèg, lé sèk. 350000 moun i viv èk inn ti mwayin, kont pa sak i atann in kaz dopi lontan. Néna in kantité d’moun i viv ankor èk inn ti lèd alimantèr. Ala nout bilan, boudikont nout bilan dopi lontan.

Alors pou 2016 ? Désertin i di, fo rovwar an gran nout sistinm, vik sad la dopi lontan i aminn a nou dann mir. Si dopi 2012 nou lavé in gouvérman té okip in pé pou vréman nout dévlopman ? Sanm pou mwin, li lé plito tanté fé lo kontrèr sak li la promi. Néna i di, si sak la pa èt fé sar pi fé, vik I prétan, sotansi lo gouvérman lé pi la èk sa, zot i argard plito pou 2017é bann moun i koné i di konmsa, zot na plito tandans dériv d’si la drwat. Alors atann mé kont pa d’si !


Kanalreunion.com