Oté

An aoir plito in vèr par-la. Akoz pa ?

Justin / 23 avril 2010

Konm toute péi la Frans nana gran-gran problèm pou réglé. Ni sava pa fé la list, pars lé long épi pars nout toute i antann parl dé sa dann télé. Bin alor, si nana toute kalité gran problèm, par raporte de koi lo prézidan la Frans l’apré fatig ali dsi la "burka” épi dsi bann marmay kan i bash lékol ?
Moin pèrsonèl, si moin lété prézidan, moin n’ora domann in sou-ministr pou okip z’afèr konmsa, pars moin n’oré pa vouli rabès mon rol. A ! Prézidan la Frans, sa sé in post inportan, tro inportan pou alé okip bann z’afèr la pa tro konsékan. Mé, oila, bann ministr i doi z’ète kontan, vi k’prézidan i fé konm si zot té pa kapab fé aryin par zot-mèm. Poitan, an zénéral, sa in bann moun kador sa, instruyé sa. Alors, pou kossa i travay pa èk zot an konfyans ?
Mon kamarade Zanbash la di amoin, sé zis pars prézidan i vé porte ankor in kou zéléksyon l’ané 2012, alors i fo li fé byin oir ali par bann moun i pass zot tan pou krétik bann marmay i bash lékol, épi zot famiy… é i siporte pa bann madam voilé dépi an-o ziska an-ba. Zanbash i di sa, mé moin mi kroi li tronp. Pars si sak li di lé in pé vré, lé pa totalman. Mon gro mèr té i di konmsa, bann moun konmsa k’i bouz-bouz in bonpé, noré plito konm in vèr par-la. Akoz pa ?

 Justin 


Kanalreunion.com