Oté

An éspéran la vi sar in pé plis méyèr domin !

Justin / 31 mé 2010

Yèr té la fète dé mèr. In gran jour byinsir, mé k’i tonm pa partou mèm date. Shak péi, k’i fète bann momon la shoizi son prop jour... mé, dizon, sa i anpèsh ar pa nou pans toute bann momon, partou dsi la tèr. Ni pé mèm pans bann momon la fine pass l’ote koté, la fine dépass la vi.
Fété ? Oui, mé fété sé in gran mo, pars toulmoun, in pé partou, la poin moiyin pou fé la fète zour-la. I fo pa ni obli nana dé santène milyon zanfan i mor d’faim toulézan, donk lé difisil domann bann famiy pou fé la fète bann momon. Nana bann péi ousa na la guèr, donkalors, kèl fète ou i fé kan na la guèr ? Issi mèm, La Rényon, nana sak na lo pourkoi épi sak na poin, sak na lo moiyin épi sak na poin, sak lé dann malizé épi sak lé dann shomin galizé. Nana ossi toute bann ti traka la vi, k’i obliz aou fèteso fète so fète-la kontrékèr.
A partsa ? Alon di touzour bone fète bann momon. Alon pans nout momon, si èl lé ankor déssi la tèr, mèm si èl lé fini d’pass koté d’tanto... An éspéran la vi va shanj in pé. An éspéran pou l’imanité la vi sar in pé plis méyèr domin k’èl lé zordi.

 Justin 


Kanalreunion.com