Oté

An-parl lite kont l’ilétrism san parl nout lang kréol... Sé souf dann in violon pou tir in son

Justin / 25 juin 2011

Astèr, si lo ga lé kréolofone épi frankofone, sinkant-sinkant, donk si li lé kréolokoz épi frankokoz, kréolokonpran épi frankokonpran, frankolir é frankoékrir pars i lir pa é i ékrir pa an kréol, an zénéral... Sa i fé mové zanr ! Lo tèks sinp lé dann la lang fransèz bien antandi. L’èr-la li lir lo tèks sinp épi li rozistr dési disk dir son mémoir in zanbrokal lo mo épi bann pti bout fraz an fransé épi an kréol galman. Aprésa, li mète in pé l’ord dann son diks épi li ékrir lo tèks a-popré rosanblan sak li la lir. L’èr-la, mi sipoz, i mète ali anparmi sak i koné lir épi ékrir, donkalor létré. Astèr, alon oir lo ka, lo boug lé krolofone katrovin pour san é frankofone vin pour san. Mi sipoz li nyabou déshif lo tèks sinp, mé dési disk dir son mémoir nana in zanbrokal li gingn pa démayé, par li-mèm, donkalor lo tèks li va ékri — si li ékri — i arsanm ar pa lo tèks sinp la done ali pou travay dési. Donkalor va done ali lo titr bourik é va mète ali an-parmi bann z’ilétré.
Pou kosa mi di sa ? Pars pétète partaz demoun an dé parti, in parti ilétré é in parti k’lé pa, i pé ète intérésan, mé konm di in komik, sa i fé pa avans lo schmil-blik, mé sa i pé done in l’idé dési la soufrans in pé nana dovan in tèks, sansa mèm kan li antan di in tèks. Parl pi pou désèrtin ramas in pé la konésans pou li débrouye son kari dan la vi.
L’èr-la, kosa i fo fé ? Amène tout demoun ziska lo poin d’ète frankofone épi kréolofone, sinkant-sinkant. Donkalor, siprime l’ilétrism ? Bien bon, si mi tronp pa, sa i fé kèk z’ané i sèy fé sa, é i gingn pa, é bann moun séryé i pans sar pa domin la vèy. Mèm zamé si i shanj pa lo tik-tak, si i ansèrv pa nout lang kréol dann la lite kont l’ilétrism. Parl la lite kont l’ilétrism san parl nout lang kréol rényoné, sé souf dann in violon pou tir in son.

Justin


Kanalreunion.com