Oté

An plinn d’dan dsi Rénion Promièr !

Justin / 25 mars 2013

Samdi soir, Rénion Promièr i prézant in l’émisionn variété. Mé avann prézant lo z’afèr, lo l’animatèr i domann son bann dalon pou fé atansion. Pou kosa ? Pars pou li, si i kontinié konm sa, lo l’émision i dir ar pa lontan. Kosa k’i shas pa ? Inn-dé z’afèr, a komansé par lo dansé désèrtèn pèrsone, si moin la bien konpri, lo dégène té in pé obscène. Pétèt li la pa di mo-la, mé i arsanm bien té sa. Kosa i vé dir obscène ? Mon diksionèr fidèl i di amoin, sa i vé dir in zès lé pa a fèr dovann moun, mé moin lé pa pli avansé vi k’moin la pa vi lo zès, épi si sé sak mi pans, dann télé, lé pa sak i mank. An plis ké sa, mon diksionèr fini par dir amoin, in l’obscénité, sé in vré l’atanta kont la pidèr, lo bon gou… in zanr vilgarité.

Mi kontinié rogard lo l’émision ép mi antann lo nom bann z’invité : nana Bernard Joron, in gran shantèr, d’ot ankor, épi toudinkou, mi antann lo nom Virapoullé. L’èr-la, mi di dan mon kèr, sé pa si sa sré pa in n’afèr obscène sa ? In l’atanta kont lo bon gou ? In vilgarité ? In n’afèr k’i fo pa fé d’van l’moun ? Défoi lé pa si fasil pou débisk l’obcénité. Mon madam i ékout osi, épi èl i di amoin, èl i oi pa kosa Virapoullé i vien fé dann in l’émision pou amizé. Lo l’animatèr i kontinié son prézantasion épi li di, mésié Virapoullé lé pi mèr, lé pi dépité, lé pi sénatèr, lé pi konséyé zénéral, donk li èmré bien konèt kosa i fé bouj akor lo boug, si na in n’afèr k’i fé bouj ali ankor ?

Si li l’avé lir “Zournal de l’il” dan la somèn, si li l’avé ékout radio, li nora konpri Virapoullé té fine lans son plan kom’. Li nora mèm konpri, li osi té dan lo plan kom’. Pars kan i kartone dan bann média près pandan in somèn, lé dir pa rann aou kont. Pou moin, sa sé in plan rant lo pèrsonaj épi lo bann média. Lo rézilta, Virapoullé i di, li lé kandida z’éléksionn mèr Sint-André, pars li sé in onm politik, pars demoun Sint-André i mank ali, épi li mank bann moun Sint-André. In kozman bien ouilé, li pé fé pas sa dan l’opinion avèk konm ki diré konm konplis bann média... avèk l’arzan nout z’inpo.

Mi koné pa si sa lé obscène, mé l’énormité, sa mi koné, la manipilasion l’opinion, sa mi koné galman, é sof si mi tronp, nou té an plin d’dan dsi Rénion Promièr.

NB : La manipilasion, sa i fé parti la kitir Rénion Promièr. Lo mèm ké dann tan RFO-RFzéro. Lo mèm ké dann tan lo RTF.

Justin


Kanalreunion.com