Oté

Anon rant anndan par gran baro !

Justin / 3 zanvié 2015

Lané 2014 la finn alé, konm di la tradisyon viv lané 2015. Sak la finn pasé i kont pi, sak lé dérièr lé lwin sof pou baz pardsi pou konstri otshoz, boudikont sak lé mié pou 2015. Mé anon pa rogard ryink dann rétrovizèr, tanzantan lé bon zèt in ziyé pou pa bat dodan mé odrémié touzour rogard par dovan. Pou désértin 2014 té in lané nwar, poukoué ? La kraz mimit tout lané, kiswa an pérsonèlman ousinonsa an zénéral, sétadir in lané té dir pou nyabou tonir, pou dot iparé té in lané blan, sanm pou mwin, pa mié vik té blan sétadir lavé pwin.

Ni koné pa kosa sora domin 2015, lavnir va di, sanm pou mwin domin sora séké nou va nyabou fé par nou minm. Pou sa, na pran inn dé bon rézolisyon pou 2015. Daborinn mi souèt zot tout in bon lané 2015 dan linyon èk bokou d’bonèr pou zot tout, sirtou la santé. Poukoué linyon ? Paské nou lé pli for kan nou lé ini, kiswa dan nout famy, kiswa dan tout sak nou antropran. Konm i di nou nora bozwin linn alot pou mèt ansanm tout lané, dopi mwa d’mars ziska mwa désanm, inn ti provèrb kréol i di « inn min i lav lot é lé dé i lav la figir »In pé i di osi « ini ni gingn divizé ni pèrd »

Donkalor, bord pa pèrsonn, avaz pa d’moun, odrémié kass lanbordir èk tout. In not bon rézolisyon pou nou. Konm péi la grèss lé apré fé, anon atak 2015 an vayan, shomiz rouvèr.konm di mon dalon, argard pa solman otour, fo argard osi lé zalantour. Anon fé konm péi la grèss, laba tansyon-pangar 2015. Pou la grèss, mwin néna in léspwar, banna la promèt pou 2015 fé in triyaz, sak lé bon i amass, sak lé ranss i zèt. Ansanm-avèk anon pran in dérnié rézolisyon pou 2015, anon fé konm bana, in bon manièr pou rant dann listwar, anon rant anndan par gran baro !


Kanalreunion.com